سلتي 0

المدونة

طالب الطب الأعلى في معدل الاكتئاب و الانتحار

“كيت سمبسون – طالبة طب في جامعة ليفربول-” بتقول إن جالها اكتئاب و اضطراب في الأكل و أرق ، لما الدكتور قالها إنها لن تصبح طبيبة أبدا ، أثناء راوند الكلينكال الأول بتاعها . حست وقتها إنها مش عارفه تعمل حاجة و إنها المرة الأولى اللي جت ف دماغها فكرة الانتحار اللي فضلت في دماغها شهور . و بدل ما كانت تحضر محاضراتها كانت للأسف بتروح المستشفى تتعالج من الاكتئاب اللي الدكتور كان السبب فيه . بتوصف إحاسسها بدل ما تروح الكلية تحضر المحاضرات بتروح تتعالج ف المستشفى ” إنها مشاعر ساحقة و مؤلمة جدا ” .
في بحث اتعمل على أكتر من 122 ألف طالب في كلية الطب ، كانت النتيجة إن نسبة الاكتئاب عند طالب الطب هي الأعلى من الطلبة العاديين في أي كلية تانية . 11% منهم كان عنده أفكار انتحارية ، و 30% منهم بيتعالجوا من الاكتئاب فعليا أثناء الدراسة في الكلية 😊
الوظيفة رقم واحد في العالم في قائمة الانتحار هي وظيفة الطبيب . تخيل لما يفشل الدكتور في علاج نفسه . الضغط النفسي و التوتر و قلة النوم و المنهج العلمي الأكثر ضخامة اللي بيتطلب من طالب الطب دراسته . دور الكلية العظيم في التشديد على الحضور المستمر المرهق و الغياب و الامتحانات الكتير جدا و طريقة التعامل مع الطلاب ، و الصدمات النفسية بسبب التعامل مع المرضى ، و تكلفة الدراسة و الكورسات و الكتب ، و السفر ، كل ده بيشكل أسباب الاكتئاب و الانتحار .
حالة طالب الطب النفسية قبل الكلية بتبقى في أفضل حالاتها و مع سنين الدراسة في الكلية اللي بيتبعها العمل بيكون الموضوع أصعب بكتير .
في قائمة أعلى الوظائف انتحارا ، رقم 1 الدكتور و بالأخص الجراحين و أخصائي التخدير . في المركز 2 دكتور الأسنان . في المركز 8 الصيدلي . في المركز 9 العلماء .
علوم الطب هي الأضخم و الأتقل حرفيا سواء من كم المعلومات الرهيب اللي بندرسه أو الكلينكال اللي بنتعلمه و بنطبقه . سنين الدراسة حرفيا بتتعدى 11 سنة متواصلة ما بين كلية و دراسات عليا . كل ده و غيره بيجي على صحة الطالب النفسية و علاقاته الاجتماعية كمان ، إحساس الدكتور إنه عنده اكتئاب أو حتى نفسيا عاوز يتظبط شوية بس ، ده بالنسباله بيكون بمثابة وصمة عار ، و ده بيخلي المشكلة تكون أكبر بكتير . نظرتك لنفسك و نظرة المجتمع ليك لما تطلع تقولهم معلش أنا مكتئب شوية بس .

في مقال اتنشر في مجلة كلية الجراحيين الملكية في بريطانيا ، 80% من الجراحين عندهم مشاكل اجتماعية و أسرية . 60% بيعانوا من الضغط النفسي . 65% بيجيلهم أمراض عضوية مزمنة زي الضغط و السكر و أمراض القلب . 70% عندهم مشاكل مالية بسبب تكلفة التعلم و التدريب .

30% من الأطباء في شمال أمريكا بيقولوا ياريتهم ما دخلوا طب ، و كتير منهم بينصحوا ولادهم إنهم ميدخلوش طب . #مجدي_يعقوب في فيديو ليه بيقول متدخلوش ولادكوا طب الطب صعب و متعب .

الإحصائيات دي في أمريكا و بريطانيا و مفيش داعي أتكلم عن الوضع في دولنا العربية .
البوست ده مش عشان تكتئب أو تُحبط لكن عشان نفهم إجابات بعض الأسئلة ، أد ايه صحتك النفسية مهمة ؟
ايه ترتيب صحتك النفسية ما بين أولويات حياتك ؟ بتعمل ايه عشان تراضي نفسيتك ؟
و الأسئلة الأهم امتى نظم التعليم عندنا هتفهم إنهم بيدمروا حياة الطلاب ؟ امتى الأستاذ الدكتور يفهم إن الطالب اللي قدامه ده جاله اكتئاب من اللي بيعملوه فيه ؟ امتى يفهم إنه بيعاني و ف لحظة ممكن يكره حياته كلها ؟
امتى المجتمع مبيصش للي بيعاني من ضعط نفسه إنه بيدلع أو للي بتيجله أفكار انتحارية إنه بيتسهبل ؟

لو انت مش مستمتع بدراستك دلوقتي فاعتبر إن ده تنبيه إن في حاجة غلط ، و تنبيه للمسؤولين إن هما عايشين بالنظم بتاعتهم في عالم موازي .

لا تفقد نفسك و أنت تحاول إنقاذ الآخرين . لا تفقد نفسك و أنت تتعلم .

 

 

 

أما إذا كنت ترغب بالجانب الإيجابي لهذا الموضوع و كيف يمكن أن تتعلم باستمتاع و تتغلب على المشاكل النفسية ,,, تابع المقالة القادمة …

 

 

 

@المصادر العلمية :

http://student.bmj.com/student/view-article.html?id=sbmj.j1460

https://publishing.rcseng.ac.uk/doi/full/10.1308/rcsbull.2018.339?fbclid=IwAR0drFECZFAnC-0w3psSbNuyHD6Brz7UHhpo13nJg29Vq9oYrUIzO3j2TtQ&

9 Jobs With The Highest Suicide Rates

اترك تعليقاً

WhatsApp chat